Bütün ailə üçün nəzərdə tutulan yaradıcılıq ustad dərsləri silsiləsi davam edir.  Uşaqları və böyükləri Teatr O2-nun rəssamı Çingiz Babayevin “Kölgələrin Sehri” adlı kölgə teatrı üzrə ustad dərsinə dəvət edirik.

Kölgə teatrı ən sirli teatr növlərindən biridir. Konturlar və siluetlər, hərəkət edən kölgələr, qaranlıq zalda rəngli işıq effektləri sehrli nağıl aləmi yaradır. Ekranın arxasında hərəkət edən kölgələri izləmək həm uşaqlar, həm də böyüklər üçün maraqlıdır. Lakin daha da maraqlısı — kölgə teatrının necə yaradıldığını öyrənmək, əsl kölgə kuklalarını əlinizdə saxlamaq və sehrli effektlərin sirlərini kəşf etməkdir...

Gəlin bir az sehrbaz olaq və kölgələrlə oynayaq! Ustad dərsinin sonunda uşaqlar azərbaycan nağılının motivləri əsasında, Çingiz Babayevin yaratdığı müəllif siluet kuklaları ilə kiçik tamaşa nümayiş etdirəcəklər.